clandeſtinement au fond d’vn caueau, le fruict du
ventre de laquelle ſe voyoit eſtre liuré auec deux
cens eſcus à vne pauure femme fripiere de ſon
meſtier pour en faire, s’il eſtoit poſſible, vn Eſplandian :
l’enfant auoit apporté du ventre de ſa mere ces deux vers imprimez ſur ſa poictrine.
Mes peres furent A & I, ma mere vne M.
Le monde fiſt mon corps & l’Egliſe mon ame.
VI.
En la ſixieſme, l’on pouuoit congnoiſtre les Phileſeuquies d’vn tas & grãde multitude de tant de boucs formez & peres que de ieunes Vedels à poils follet, il y en auoit de diuerſes Prouinces, comme Manceaux, Angeuins, Percherons, Pariſiens, Vendoſmois, & autres, vne partie deſquels cheuauchoit la Mule & l’autre eſtoit à pied ſur des aſnes à courtes oreilles tous enſemble & à l’eſcart en Tapinois Tiroient d’arcs elabourez d’iuoire à vn meſme but, & chacun d’eux inuoquoit le Sainct de la parroiſſe qu’il croyoit auoir plus de voix en chapitre à ce qu’ils pretendoient : ce but eſtoit vne Nymphe à laquelle la nature auoit deſparty prodigalement tout ce qui eſtoit reſerué de plus rare & exquis beaucoup de ſiecles deuant ſa naiſſance au centre du cabinet de ſes merueilles. Plutus auoit ſecondé ſes miracles des fortunes humaines dont il eſt le diſpenſateur afin qu’il n’y euſt rien de manque & de redire en icelle : bref, le Ciel ſe pouuoit vanter d’eſtre l’vnique geniteur de ceſte Nymphe eſtant accomplie en ſon tout de ce que meſmes les deitez peuuent ambitiõner pour eſtre dictes parfaictes : lon voyoit tous les ſuſdicts dans vne partie de ceſte piece luy donner quantité de bonnetades du creu de leur
