lors l’office d’Huyſſier (non en meſme qualité de
ceux-là que le legiſlateur Lycurgue auoit anciennement
choiſis entre les plus aagez, & inſtitué
portiers és conuiues publics pour aduertir les aſſiſtans
en leur monſtrant l’entrée quand ils arriuoiẽt
par ceſte forme.
Per has nullus egrediatur ſermo.) Mais bien comme eſpion, & de crainte qu’aucun mauuais démon & ennemy de leurs machinations n’entraſt, ne cogneuſt dans l’Almanach d’vn iect d’œil qu’il me lança que ie n’eſtois inuentorié dans la legende de ſes Saincts. Ce qui euſt cauſé ſans faulte autant de ſcandale que iadis l’impieuſe curioſité de Clodius aux Nocturnes ceremonies de la bonne Deeſſe engendra de rumeur & faſcherie parmy les matrones Romaines, ſi comme vous ſçauez que la neceſſité eſt mere d’inuention, ie ne lui euſſe garny la main ex templò d’vne paire de doublons qui monſtrerent en ſoy telle Energie qu’au meſme moment ils endormirent ces doigts deſia accrochés ſur le colet de mon pourpoinct par vne vertu empruntée de l’ancre enfermée dãs la veſſie appellée, Mittis, de ce poiſſon marin qui rend tellement ſtupides & engourdis les membres de celuy ſur lequel elle eſt deſcoulée qu’il eſt contrainct, aneanti, de laſcher priſe, ſa ſeule ſauueté conſiſtant en ceſte humeur noire & eſpeſſe.
————— Quid non mortalia pectora Cogis
Auri Sacra fames ?
Les Tribades s’appuyoient du tout ſur la fidelité de ce Ianus Poſticus, & pour vne bien petite ſomme d’argent les voila elles, & toute leur caballe mal-heureuſement trahie.
