mil ſix cents ſept, dans le centre de l’eſpeſſeur diſ-ie,
les Tribades Lemanes, Vnelmanes, Propetides
s’aſſemblerent pour d’vne meure deliberation, d’vne
viue voix & toutes d’vn accord apporter la derniere
main à l’execution ruineuſe de l’honneur,
vie & biens de Calianthe, adeo hic mundus totus poſitus
in maligno eſt. Celuy-ci (afin que ie ne taiſe ſon
eſtre) eſtoit né dans la meſme ville, où les ſuſdictes
Tribades auoient choiſi lieu pour leur Synode.
————— Neque illum Argolica de gente negabo.
Et auoit pris ſon origine des meilleures maiſons
d’icelles, ces anceſtres ayant laiſſé apres eux vne extreme
bonne odeur de leur nom, comme perſonnes
exemptes de la dent des plus aſpres Zoiles, &
de la main des plus ſeueres cenſeurs, ſes fortunes
eſtoient telles qu’elles ne cedoient aus mieux meſnagers
de toute la prouince, ſes merites & galentiſes
(afin que ie le faſſe court) ſont caracterées dans
ſa propre vie. Modion & Tiligiton.
Omnis Ariſtipum decuit color, & ſtatus, & res.
Or afin que le vray motif de ceſte aſſemblée vous
ſoit ouuertement deduicte, vous deuez entendre
que le ſuſnommé ayant iuſques à l’age de vingt &
quatre ans, veſcu en la reputation, & pour la qualité
de ſon extraction, & pour la quantité de ſes fortunes,
telle qu’il n’y auoit aucun dans le cercle des
murailles de ſa ville qui l’euſt oſé ſuiure ſeulement
à la Piſte voulut au bout de ce temps couronner
tous les trauaux par luy endurez ſoubs les eſtendars
de la ſaincte neufuaine des ſœurs Heliconiennes
per tot impotentia freta de toutes les fameuſes vniuerſitez
de la France, & ce par le ſacré lien d’Hymen
le Dieu Nopcier, celle à laquelle il ſacrifioit