avecq son chariot à quatre roues et à quatre chevaulx, tout chargé de fagotz, entra dedans son membre si avant que le cheval de devant vint jusques aux genitoires, qui ne povoit passer ; parquoy il fut contrainct de demourer toute la nuict à cheval atout son fouet au poing jusques au lendemain, que Bringuenarilles fust esveillé, lequel pensoit avoir la gravelle ; parquoy il se mit à pisser, et lors pissa le chariot à reculons tout le premier, et puis les chevaulx et le chartier tenant encor son fouet au poing ; lequel fut presque noyé à cause de la grande abondance d’eau qui luy sortoit du corps et de la vessie, et, sans les fagotz, le chartier, le chariot et les chevaulx eussent esté noyez ; et ainsi le debvez croire.
Comment les poulles et poussins croissoient au ventre de Bringuenarilles.
CHAPITRE V.
OR est ainsi qu’il aimoit fort les œufz, parquoy il luy en falloit à chascun repas bien le nombre de cinquante milliers pour le moins : car il les avalloit sans mascher, comme poys creuz, tout entiers sans casser,
