& changea d’habillemens ensemble tous les vaillans champions & nobles combatans, fut dressé en sumptuosité & magnificence si grande, qu’elle pouuoit effacer les celebres banquetz de plusieurs anciens Empereurs Romains & Barbares : voire certes la patine & cuisinerie de Vitellius, tant celebree, qu’elle vint en prouerbe, au banquet duquel furent seruies mille pieces de poisson. Ie ne parleray point du nombre, & rares especes des poissons icy seruiz : il est par trop excessif. Bien vous diray, qu’à ce banquet furent seruies plus de mille cinq cens pièces de four : i’entens patez, tartes, & dariolles. Si les viandes furent copieuses, aussi furent les beuuettes numereuses. Car trente poinsons de vin, & cent cinquante douzaines de pain de bouche ne durerent gueres, sans l’autre pain mollet & commun. Aussi fut la maison de mon dit Seigneur Reuerendissime ouuerte à tous venans, quelz qu’ilz fussent, tout iceluy iour. En la table premiere de la salle moyenne furent contez douze Cardinaux, sauoir est,
Le Reuerendissime Cardinal Farnese.
R. C. de saint Ange.
R. C. sainte Flour.
R. C. Sermonette.
R. C. Rodolphe.
R. C. du Bellay.
R. C. de Lenoncourt.
R. C. de Meudon.
R. C. d’Armignac.
R. C. Pisan.
R. C. Cornare.
R. C. Gaddi.
Son Excellence, le Seigneur Strossi, l’Ambassadeur de Venise. Tant d’autres Euesques & Prelatz. Les
