il se trouua tout couuert de feu, & crioit comme vn enragé, fuyant deça & delà, & bruslant ceux qu’il touchoit. Puis deuint noir comme vn Ethiopien, & si bien marqué au visage, qu’il y paroistra, encores d’icy à trois mois. Sus la consommation du ballon fut sonné à l’assaut, de la part de son Excellence, lequel auecques ses hommes d’armes à pied couuers de grandes targes d’arain doré à l’antique façon, & suiuy du reste de ses bandes entra sus le pont susdit. Ceux du dedens luy feirent teste sus le rempart & barriere. A laquelle fut combatu plus felonnement que n’auoit encores esté. Mais par force en fin franchirent la barriere, & entrerent sus le rempart. Auquel instant lon veit sus la haute tour les armoiries de sa Maiesté enleuees auecques festons ioyeux. A dextre desquelles peu plus bas estoient celles de mon seigneur d’Orleans, à gauche celles de son Excellence. Qui fut sur les deux heures de nuict. La Nymphe rauie fut presentee à son Excellence, & sus l’heure rendue à Diane, laquelle se trouua en place comme retournant de la chasse.
Le peuple assistant, grans & menuz, nobles & roturiers, reguliers & seculiers, hommes & femmes bien au plein esiouiz, contens, & satisfaits feirent applausement de ioye & alaigresse, de tous costez à haute voiz crians & chantans Viue France, France, France, viue Orleans, viue Horace Farnese. Quelques vns adiousterent, Viue Paris, viue Bellay, viue la coste de Langey : nous pouuons dire ce que iadis lon chantoit à la denonciation des ieuz Seculares : Nous auons veu ce que personne en Rome viuant ne veit, personne en Romme viuant ne verra.
L’heure estoit ia tarde & opportune pour soupper, lequel pendant que son Excellence se desarma,
