au cordon : laquelle, comme ay dit, estoit de brique. De ce aduinc que le fossé fut remply. A la cheute resta l’artillerie du dedens descouuerte : vn bombardier tomba mort du haut de la grosse tour. Mais c’estoit vn bombardier de foin reuestu. Ceux du dedens adonques commencerent à remparer derriere ceste breche en grand effort & diligence. Les forains ce pendant feirent vne mine, par laquelle ilz mirent le feu en deux tourrions du chasteau, lesquelz tombans par terre à la moitié, feirent vn bruit horrible. L’vn d’iceux brusloit continuellement, l’autre faisoit fumee tant hydeuse & espaisse, qu’on ne pouuoit plus voir le chasteau.
Derechef fut faite nouuelle batterie, & tirerent les cinq grosses pieces par deux fois contre le chasteau. Dont tomba toute l’escarpe de la muraille : laquelle, comme ay dit, estoit faite de tables & limandes. Dont tombant par le dehors feit comme vn pont tout couurant le fossé iusques sus le reuelin. Resta seulement la barriere & rempart, que les tenans auoient dressé. Lors pour empescher l’assaut des forains lesquelz estoient tous en ordonnance au bout de la place, furent iettees dix trombes de feu, canons de fusees, palles, mattons, & potz à feu : & du rempart fut ietté vn bien gros ballon en la place, duquel à vn coup fortirent trente bouches de feu, plus de mille fusees ensemble, & trente razes. Et couroit ledit ballon parmy la place, iettant feu de tous costez, qui estoit chose espouuentable. Fait par l’inuention de messer Vincentio Romain, & Francisque Florentin, bombardiers du Pere saint. Frerot faisant le bon compagnon courut apres ce ballon, en l’appellant gueulle d’enfer, & telle de Lucifer, mais d’vn coup qu’il frappa dessus auecques vn transon de picque,
