parmy les autres, au grand contentement de tous les spectateurs. Puis le retirerent au bout de la place à gauche vers le monastere de saint Marcel. D’icelle bande pour les gens de pied estoit Capitaine le seigneur Astorre Baglion. L’enseigne duquel, & escharpes de ses gens, estoit de couleurs blanc & bleu. Le seigneur Duc Horace estoit chef des hommes d’armes, desquelz voluntiers i’ay cy dessouz mis les noms, pour l’honneur d’iceux.
L’Excellence dudic seigneur Duc.
Paul Baptiste Fregose.
Flaminio de Languillare.
Alexandre Cinquin.
Luca d’Onane.
Theobaldo de la Molare.
Philippe de Serlupis.
Dominique de Massimis.
P. Loïs Capisucco.
P. Paule de la Cecca.
Bernardin Piouene.
Ludouic Cosciari.
Ian Paule escuier de son Excellence.
Tous en harnois dorez, montez sus gros Coursiers, leurs pages montez sus Genetz, & cheuaux Turcs, pour le combat à l’espee.
La liuree de son Excellence estoit blanc, & incarnat, laquelle pouuoit on voir es habillemens, bardes, caparassons, pennaches, panonceaux, lances, fourreaux d’espees, tant dessusdits cheualiers, que des pages & estaffiers, qui les fuyuoient en bon nombre. Ses quatre trompettes vestuz de casaquins de velours incarnat decouppé, & doublé de toille d’argent. Son Excellence estoit richement vestue sus les armes d’vn accoustrement fait à l’antique de satin incarnat bro-
