plus belle & longue de Rome : par ce aussi, & principalement que le palais dudit Seigneur Reuerendissime est sus le long d’icelle place. En icelle donques deuant la grand’porte d’iceluy palais fut par le deseing du Capitaine Ian Francisque de monte Melino erigé vn chasteau en forme quadrangulaire, chacune face duquel estoit longue d’enuiron vingt & cinq pas : haute la moitié d’autant, comprenant le parapete. A chacun angle estoit erigé vn tourrion à quatre angles acutz : desquelz les trois estoient proiettez au dehors, le quatrieme estoit amorti en l’angle de la muraille du chasteau. Tous estoient percez pour canonnieres par chacun des flans & angles interieurs en deux endroitz, sauoir est au dessouz & au dessus du cordon. Hauteur d’iceux auecques leur parapete, comme de ladite muraille. Et estoit icelle muraille pour la face principale qui regardoit le long de la place, & le contour de ses deux tourrions, de fortes tables & esses iusques au cordon : le dessus estoit de brique, pour la raison qu’orrez par cy apres. Les autres deux faces auecques leurs tourrions estoient toutes de tables & limandes. La muraille de la porte du palais estoit pour quarte face. Au coing de laquelle par le dedens du chasteau estoit erigée vne tour quarree de pareille matiere, haute trois fois autant, que les autres tourrions. Par le dehors tout estoit aptement ioint, collé, & peint, comme si sussent murailles de grosses pierres entaillees à la rustique, telle qu’on voit la grosse tour de Bourges. Tout le circuit estoit ceint d’vn fossé large de quatre pas, profond d’vne demie toise & plus. La porte estoit selon l’aduenue de la porte grande du palais, esleuee pour le machicoulis enuiron trois piedz plus haut que la muraille : de laquelle descendoit
Page:Rabelais marty-laveaux 03.djvu/405
Le texte de cette page a été corrigé et est conforme au fac-similé.
397
la sciomachie.
