Page:Rabelais marty-laveaux 03.djvu/403

Le texte de cette page a été corrigé et est conforme au fac-similé.
395
la sciomachie.

voyant par la part ennemie à vn faux rapport estre faits feuz parmy les rues de Rome, comme si ledit Roy eust perdu la bataille : quelques iours apres aduerti de la verité du succes, & de sa victoire, acheta cinq ou six maisons contigues en forme d’Isle, pres mont Iordan, les feit emplir de fagotz, falourdes, & tonneaux, auecques force pouldre de canon, puis meit le feu dedens. C’estoit vne nouuelle Alosis, & nouueau feu de ioye. Ainsi vouloit ledit Seigneur Reuerendissime, pour declairer l’exces de son alaigresse pour cestes bonnes nouuelles faire, quoy qu’il coustast, quelque chose spectable non encore veüe en Rome de nostre memoire. Non la pouuant toutesfois executer à sa fantasie & contentement, obstant quelque maladie suruenue en cestuy temps, audit seigneur Ambassadeur, auquel le cas touchoit pareillement à cause de son estat, fut releué de ceste perplexité par le moyen du seigneur Horace Farnese Duc de Castres, & des seigneurs Robert Strossi, & de Maligni : lesquelz estoient en pareille combustion. Ilz mirent quatre testes en vn chapperon : en fin apres plusieurs propos mis en deliberation, resolurent faire vne Sciomachie, cestadire, vn simulacre & representation de bataille, tant par eaue que par terre.

La Naumachie, cestadire le combat par eaue, estoit designé au dessus du pont Aelian, iustement deuant le iardin secret du chasteau saint Ange : lequel feu de memoire eternelle Guillaume du Bellay, seigneur de Langey, auoit auecques ses bandes fortifié, gardé, & deffendu bien long temps contre les Lansquenetz, qui depuis saccagerent Rome. L’ordre d’iceluy combat estoit tel, que cinquante menuz vaisseaux, comme Fustes, Galiotes, Gondoles & Fregates armees assailleroient vn grand & mons-