mille autres. Et est vn poinct sus lequel les Platoniques ont fondé la participation de diuinité es Dieux tutelaires, lesquelz noz Theologiens appellent Anges gardians. Mais ce propos excederoit la iuste quantité d’vne epistre. Tant est, que lon creut par les banques cestes nouuelles si obstinément, que plusieurs de la part Françoise sus le soir en feirent feuz de ioye, & marquerent de croye blanche sus leurs calendiers ceste fauste & heureuse iournee. Sept iours apres furent ces bonnes nouuelles plus au plein auerees par quelques courriers de banque, venans vns de Lyon, autres de Ferrare.
Mes Seigneurs les Reuerendissimes Cardinaux François qui sont en ceste court Romaine, ensemble le seigneur d’Vrfé Ambassadeur de sa Maiesté, non ayans autre aduis particulier, delayoient tousiours à declairer leur ioye & alaigresse de ceste tant desiree naissance, iusques à ce que le seigneur Alexandre Schiuanoia gentilhomme Mantuan, arriua au premier iour de ce mois de Mars expressement enuoyé de la part de sa Maiesté, pour acertainer le Pere saint, les Cardinaux François, & Ambassadeur, de ce que dessus. Adonques furent faits de tous costez festins & feuz de ioye, par trois soirs subsequens.
Mon Seigneur Reuerendissime Cardinal du Bellay non content de ces menues & vulgaires significations de liesse pour la naissance d’vn si grand Prince destiné à choses si grandes en matiere de cheualerie, & gestes heroiques, comme il appert par son horoscope, si vne fois il eschappe quelque triste aspect en l’angle Occidental de la septieme maison : voulut (par maniere de dire) faire ce que feit le seigneur Ian Iordan Vrfin, lors que le Roy François d’heureuse memoire, obtint la victoire à Marignan. Iceluy
