Comment Rondibilis declaire Coquage estre naturellement
des apennages de mariage.
Chapitre XXXII.
este (dist Panurge continuant) vn petit poinct à vuider. Vous auez aultres foys veu on confanon de Rome. S. P. Q. R.[1] Si peu que rien. Seray ie poinct coqu ? Haure de Grace (s’escria Rondibilis) que me demandez vous ? Si serez coqu ? Mon amy, ie suys marié, vous le serez par cy apres. Mais escriuez ce mot en vostre ceruelle auecques vn style de fer, que tout home marié, est en dangier d’estre coqu. Coquage est naturellement des apennages de mariage. L’vmbre plus naturellement ne suyt le corps, que Coquage suyt les gens mariez. Et quand vous oirez dire de quelqu’vn ces trois motz : Il est marié, si vous dictez, il est doncques, ou a esté, ou sera, ou peult estre coqu : vous ne serez dict imperit architecte de consequences naturelles. Hypochondres de tous les Diables (s’escria Panurge) que me dictez vous ! Mon amy (respondit Rondibilis) Hippocrates allant vn iour de Lango en Polystylo visiter Democritus le philosophe, escriuit vnes letres[2] à Dionys son anti-
- ↑ Le sens de ces initiales, que Rabelais explique par : « Si peu que rien, » est : Senatus populusque romanus.
- ↑ Cette lettre, qui se trouve dans les anciennes éditions d’Hippocrate, est considérée comme supposée.
