Ouvrir le menu principal
Cette page n’a pas encore été corrigée


La harangue de maistre Janotus de Bragmardo faicte à Gargantua pour

recouvrer les cloches.

CHAPITRE XIX

«  Ehen, hen, hen ! Mna dies, Monsieur, mna dies, et vobis, Messieurs. Ce ne seroyt que bon que nous rendissiez nos cloches, car elles nous font bien besoing. Hen, hen, hasch ! Nous en avions bien aultresfoys refusé de bon argent de ceulx de Londres en Cahors, sy avions nous de ceulx de Bourdeaulx en Brye, qui les vouloient achapter pour la substantificque qualité de la complexion elementaire que est intronificquée en la terresterité de leur nature quidditative pour extraneizer les halotz et les turbines suz noz vignes, vrayement non pas nostres, mais d’icy auprès ; car, si nous perdons le piot, nous perdons tout, et sens et loy.

«  Si vous nous les rendez à ma requeste, je y guaigneray six pans de saulcices et une bonne paire de chausses que me feront grant bien à mes jambes, ou ilz ne me tiendront pas promesse. Ho ! par Dieu, Domine, une pair de chausses est bon, et vir sapiens non abhorrebit eam. Ha ! ha ! il n’a pas pair de chausses qui veult, je le sçay bien quant est de moy ! Advisez,