Ouvrir le menu principal
Cette page n’a pas encore été corrigée


== Comment Gargantua paya sa bien venue es Parisiens.
& comment il print les grosses cloches
de l’eglise Nostre Dame.

CHAPITRE XVII ===
Qvelqves iours apres qu’ilz se feurent refraichiz il visita la ville : & fut veu de tout le monde en grande admiration. Car le peuple de Paris est tant sot, tant badault, & tant inepte de nature, qu’vn basteleur, vn porteur de rogatons, vn mulet auecques ses cymbales, vn vielleuz au mylieu d’vn carrefour assemblera plus de gens, que ne feroit vn bon prescheur euangelicque.
Et tant molestement le poursuuyuirent, qu’il feut contrainct soy reposer suz les tours de l’eglise nostre dame. Au quel lieu estant, & voyant tant de gens, à l’entour de soy, dist clerement :
Ie croy que ces marroufles voulent que ie leurs paye icy ma bien venue & mon proficiat. C’est raison. Ie leur voys donner le vin. Mais ce ne sera que par rys.
Lors en soubriant destacha sa belle braguette, & tirant sa mentule en l’air les compissa si aigrement, qu’il en noya deux cens soixante mille quatre cens dix & huyt. Sans les femmes & petiz enfans.