& ridicule en son maintien, le nez pointu, le reguard d’vn taureau, le visaige d’vn fol : simple en meurs, rustiq en vestimens, pauure de fortune, infortuné en femmes, inepte à tous offices de la republique, tousiours riant, tousiours beuuant d’autant à vn chascun, tousiours se guabelant, tousiours dissimulant son diuin sçauoir. Mais ouurans ceste boyte : eussiez au dedans trouué vne celeste & impreciable drogue, entendement plus que humain, vertus merueilleuse, couraige inuincible, sobresse non pareille, contentement certain, asseurance parfaicte, deprisement incroyable de tout ce pourquoy les humains tant veiglent, courent, trauaillent, nauigent et bataillent.
A quel propos, en voustre aduis, tend ce prelude, & coup d’essay ? Par autant que vous mes bons disciples & quelques aultres foulz de seiour lisans les ioyeux tiltres d’aulcuns liures de nostre inuention, comme Gargantua, Pantagruel, Fessepinte, La dignité des braguettes, Des poys au lard cum commento, &c., iugez trop facillement ne estre au dedans traicté que mocqueries, folateries, & menteries ioyeuses : veu que l’ensigne exteriore (c’est le tiltre), sans plus auant enquerir, est communement receu à derision & gaudisserie. Mais par telle legiereté ne conuient estimer les œuures des humains. Car vous mesmes dictes, que l’habit ne faict poinct le moine : & tel est vestu d’habit monachal, qui au dedans n’est rien moins que moyne : & tel est vestu de cappe hespanole, qui en son couraige nullement affiert à Hespane. C’est pourquoy fault ouurir le liure, & soigneusement peser ce que y est deduict. Lors congnoistrez que la drogue dedans contenue est bien d’aultre valeur, que ne promettoit la boite. C’est à dire que les matieres icy traictees ne sont tant folastres, comme le tiltre au dessus pretendoit.
