Page:Rabelais - Pantagruel, ca 1530.djvu/99

envoyé, ouvrit les lettres et riens ne trouva dedans escript, mais seulement ung aneau d’or avecques ung Dyament en table. Et lors appella Panurge et luy monstra le cas. À quoy Panurge luy dist, que la feuille de papier estoit escripte, mais c’estoit par telle subtilité que l’on n’y veoit point d’escripture. Et pour le sçavoir, la mist aupres du feu pour veoir si l’escripture estoit faicte avecques du sel Ammoniac destrempé en eau. Puis la mist dedans de l’eau pour sçavoir si la letre estoit escripte du suc de Tithymalle. Puis la monstra à la chandelle, si elle estoit point escripte du ius d’oingnons blans. Puis en frotta une partie de huyle de noix, pour veoir si elle estoit point escripte de lexif de figuyer. Puis en frotta ung coing de cendres d’ung nic de Arondelles, pour veoir si elle estoit escripte de la rousée qu’on trouve dedans les pommes de Alicacabut. Puis en frotta ung aultre bout de la sanie des oreilles, pour veoir si elles estoit escripte de fiel de corbeau. Puis les trempa en vinaigre pour veoir si elle estoit escripte de laict d’espurge. Puis les greffa d’ayunge de souriz chauves, pour veoir si elle estoit escripte avecques sperme de baleine qu’on appelle ambre grys. Puis la mist tout doulcement dedans ung bassin d’eau fraische, et soubdain la tira pour veoir si elle estoit escripte avecques alum de plume. Et voyant qu’il n’y congnoissoit riens, appella le messagier et luy demanda. Compaing la dame qui t’a icy envoyé, t’a elle point baillé de baston pour apporter ? pensant que ce feut la finesse que met Aulle Gelle, et le messagier luy respondit. Non monsieur. Adoncques