Page:Rabelais - Pantagruel, ca 1530.djvu/86

dice à l’ongle du pouce, feisant au meillieu de la distance comme une boucle, et de la main dextre ferroit tous les doigts au poing, excepté le doigt indice, lequel il mettoit et tiroit souvent par entre les deux aultres susdictz de la main gauche, puis de la dextre estendoit le doigt indice et le meillieu, les esloignant le mieulx qu’il povoit, et les tirant vers Thaumaste : et puis mettoit le poulce de la main gauche sur l’anglet de l’œil gauche estendant toute la main comme une aesle d’oyseau, ou une pinne de poisson, et la meuvanrt bien mignonnement deça et delà, et autant en faisoit de la dextre sur l’anglet de l’œil dextre : et ce dura bien par l’espace d’ung bon quart d’heure. Dont Thaumaste commença à paslir et trembler, et luy fit tel signe, que de la main dextre, il frappa du doigt meillieu contre le muscle de la vole, qui est au dessoubz le pouce, et puis mis le doigt indice de la dextre en pareille boucle de la fenestre : mais il le mist par dessoubz, non par dessus, comme faisoit Panurge. Adoncques Panurge frappe la main l’une contre l’aultre, et souffle en paulme, et ce faict met encores le doigt indice de la dextre en la boucle de la gauche le tirant et mettant souvent : et puis esten, dit le menton regardant intensement Thaumaste, dont le monde qui n’entendoit riens à ces signes, entendit bien qu’en ce il demandoit, sans dire mot, à Thaumaste que voulez vous dire là ? Et de faict Thaumaste commença à suer grosses gouttes, et sembloit bien un homme qui estoit ravy en haulte contemplation. Puis se advisa, et mist tous les ongles de la gauche contre ceulx de la dextre, ouvrant les doigts, comme si ce eussent esté demys cercles, et elevoit tant qu’il povoit les mains en ce signe. À quoy Pa-