Page:Rabelais - Pantagruel, ca 1530.djvu/83

chercherons la resolution, dont il la fault trouver toy à moy. Et loue grandement la maniere d’arguer que as proposée, c’est assavoir par signes sans parler : car ce faisant toy et moy, nous nous entendrons, et serons hors de ces frappemens de mains, que font ces sophistes quand on argue : alors qu’on est au bon de l’argument. Or demain ie ne fauldray à me trouver au lieu et heure que me as assigné : mais ie te pry que entre nous n’y ait point de tumulte, et que ne cherchons point l’honneur ny applausement des hommes, mais la serenité seule. A quoy respondit Thaumaste, Seigneur : dieu te maintienne en sa grace te remerciant de ce que ta haulte magnificence tant se veult condescendre à ma petite vilité. Or a dieu iusques à demain. A dieu dist Pantagruel. Messieurs vous aultres qui lisez ce present escript, ne pensez pas que iamais il y eut de gens plus elevez et transportez en pensée, que furent tout celle nuyct, tant Thaumaste que Pantagruel. Car ledict Thaumaste dist au concierge de l’hostel de Cluny, auquel il estoit logé, que de sa vie ne s’estoit trouvé tant alteré comme il estoit celle nuyct. Il m’est (disoit il) advis que Pantagruel me tient à la gorge : donnez ordre que beuvons ie vous prie. De l’aultre cousté Pantagruel entra en la haulte game et de toute la nuyct ne faisoit que ravasser apres le livre de Beda de numeris et signis, et le livre de Plotin de inenarrabilibus, et le livre de Proclus de magia, et les livres de Artemidoras peri oniro criticon, de Anaxagoras peri semion, Dynarius peri aphaton, et les livres de Philistion, et Hipponax peri anecphoneton, ung tas d’aultres, tant que Panurge luy dist, Seigneur laissez toutes ces pensées et vous allez coucher : car ie vous