Page:Rabelais - Pantagruel, ca 1530.djvu/135

Le texte de cette page a été corrigé et est conforme au fac-similé.

ou du Soulphre, ou l’Allun, ou du Salpestre qui est dedans la minere : car ilz n’y font que ravasser, et mieulx leur vauldroit se aller froter le cul au panicault, que de perdre ainsi le temps à disputer de ce dont ilz ne sçavent l’origine, que lesdicts bains sont chaulx par ce qu’ilz sont issuz par une chauldepisse du bon Pantagruel. Or pour vous dire comment il guerit de son mal principal ie laisse icy comment pour une minorative il print quatre quintaulx de Scammonée Colophaniacque, six vingtz et dix huyt chartées de Casse. Onze mille neuf cens livres de Reubarbe, sans les aultres barbouillemens. Il vous fault entendre que par le conseil des medecins fut decreté qu’on osteroit ce que luy faisoit le mal à l’estomach. Et de faict l’on fist xvii. grosses pommes de cuyvre plus grosses que celle qui est à Romme à l’aiguille de Virgile, en telle façon qu’on les ouvroit par le meillieu et fermoit à ung ressort. En l’une entra ung de ses gens portant une lanterne et ung flambeau allumé. Et ainsi l’avalla Pantagruel comme une petite pillule. En cinq aultres entrerent d’aultres gros varletz chascun portant ung pic à son col. En troys aultres entrerent troys paysans chascun ayant une pasle à son col. Es sept aultres entrerent sept porteurs de coustretz chascun ayant une gourbeille à son col. Et ainsi furent avallées comme pillules. Et quand furent en l’estomach, chascun desfit son ressort et sortirent de leurs cabanes, et premier celluy qui portoit la lanterne, et ainsi chercherent plus de demye lieue où estoient les humeurs corrumpues. Finablement trouverent une montioye d’ordures : alors les pionniers fraperent sus pour les desrocher et les aultres avecques les pasles en emplirent les gourbeilles : et quand tout fut bien nettoyé, chascun se retira en