Semyramis estoit espouilleresse de bellistres. Dido vendoit des mousserons. Penthasilée estoit croissonniere.
En ceste façon ceulx qui avoient esté gros seigneurs en ce monde icy, gaingnoient leur pouvre meschante et paillarde vie là bas. Et au contraire les philosophes, et ceulx qui avoient esté indigens en ce monde, de par delà estoient gros seigneurs en leur tout. Ie veiz Diogenez qui se prelassoit en magnificence avec une grand robbe de pourpre, et ung sceptre : et faisoit enrager Alexandre le grand, quand il n’avoit pas bien repetassé les chausses, et le payoit en grans coups de baston. Ie veiz Patelin qui marchandoit des petitz pastez que cryoit le pape Iules : et luy demanda combien la douzaine ? troys blancs, dit le pape. Mais dist Patelin, trois coups de barre, baillez icy villain baillez, et en allez querir d’aultres : et le pouvre pape s’en alloit pleurant, et quand il fut devant son maistre patissier, il luy dist, qu’on luy avoit ostez les pastez. Adonc le patissier luy bailla l’anguillade si bien que la peau n’eust riens vallu à faire cornemuses. Ie veiz maistre Iehan le mayre qui contrefaisoit du pape, et à tous ces pouvres roys et papes de ce monde faisoit baiser ses pieds : et en faisant du grobis leur donnoit la benediction, disant. Gaingnez les pardons coquins, gaignez, ilz sont à bon marché. Ie vous absouz de pain et de souppe : et vous dispense de ne valoir iamais riens, et appela Caillete et Triboulet, disant. Messieurs les cardinaulx depeschez leurs bulles, et chascun ung coup de pau sus les reins : ce que fut faict incontinent. Ie veiz maistre François Villon qui demanda à Xerces combien la denrée de moustarde ? ung denier, dist Xerces, à quoy dist ledict de Villon : Tes fiebvres
