iours bon pied et bon œil, par ce demarcha du pied gauche ung pas en arriere, mais il ne sceut si bien faire que le coup ne tombast sur sa barque, laquelle rompit en six pieces et versa le reste du sel en terre. Quoy voyant Pantagruel desploya ses bras et comme est l’art de la hasche, luy donna du gros bout de son mast, en estoc au dessus de la mamelle, et retirant le coup à gauche en taillade luy frapa entre col et collet, puis avanceant le pied droict luy donna sur les couillons ung pied du hault bout de son mast, à quoy rompi la hune, et versa troys ou quatre poinssons de vin qui estoient de reste. Dont Loupgarou pensa qu’il luy incisé la vessie, et du vin que ce feut son urine qui en sortit. De ce non content Pantagruel vouloit redoubler au coulouer : mais Loupgarou haulsant sa masse avancea son pas sur luy, et de toute sa force la vouloit enfoncer sur Pantagruel, et de faict en donna si vertement que si Dieu n’eust secouru le bon Pantagruel, il l’eust fendu despuis le sommet de la teste iusques la ratelle : mais le coup declina à droict par la brusque hastiveté de Pantagruel. Et entra sa masse plus de soixante pieds en terre à travers ung gros rochier dont il feit sortir le feu plus gros qu’ung tonneau. Ce que voyant Pantagruel, qu’il s’amusoit à tirer ladicte masse qui tenoit en terre entre le roc, luy court sus, et luy vouloit avaler la teste tout net : mais son mast de male fortune toucha ung peu au fust de la masse de Loupgarou qui estoit phée (comme avons dit devant) par ce moyen son mast luy rompit à troys doigts de la poignée. Dont il feut plus estonné qu’ung fondeur de cloches, et s’escrya. Ho Panurge où es tu ? Ce que ouyant Panurge, dist au roy et aux geans. Par dieu ilz se feront mal, qui ne les despar-.
Page:Rabelais - Pantagruel, ca 1530.djvu/120
Le texte de cette page a été corrigé et est conforme au fac-similé.
