queter avecques eulx à leurs despens, sans estre congneu de nully, et de visiter l’artillerie, les tentes de tous les capitaines et me prelasser par les bandes sans iamais estre descouvert car le diable ne m’affineroit pas, car ie suis de la lignée de Zopyrus. Moy, dist Epistemon, ie sçay tous les stratagemates et prouesses des vaillans capitaines et champions du temps passé, et toutes les ruses et finesses de discipline militaire, ie iray, et encores que feusse descouvert et decelé, ieschapperay en leur faisant croire de vous tout ce que me plaira : car ie suis de la lignée de Sinon. Moy, dist Eusthenes, ie entreray par atravers leurs tranchées, maulgré le guet et tous les gardes : car ie leur passeroy sur le ventre et leur rompray bras et iambes, et feussent ilz aussi fors que le diable : car ie suis de la lignée de Hercules. Moy, dist Carpalim, ie y entreray si les oyseaulx y entrent : car iay le corps tant allaigre que ie auray saulté leurs tranchées et percé oultre tout leur camp, devant qu’ilz me ayent apperceu. Et ne crains ny traict, ny flesche, ny cheval tant fois legier et feusse Pegasus de Perseus, ou Pacollet, que devant eulx ie n’eschappe guaillart et sauf. Ientreprens de marcher sur les espiz de bled, sur l’herbe des prez, sans qu’elle flechisse dessoubz moy : car ie suis de la lignée de Camille Amazone.
Comment Panurge, Carpalim, Eusthenes, et Epistemon, compaignons de Pantagruel, desconfirent six cens soixante chevaliers bien subtilement.Cha. xvi
insi qu’il disoit cela ilz vont adviser six cens soixante chevaliers montez à l’advantaige sur chevaulx legiers,
