Bouloigne (car il craignoit ly bouconé de Lombard) mais de Bigorre, de Lonquaulnay, de la Brene, de Rouargue. En son eage virile espousa Gargamelle fille du roy des Parpaillos, belle gouge et de bonne troigne. Et faisoient eulx deux souvent ensemble la beste à deux douz, ioieusement se frotans leur lard, tant qu’elle engroissa d’un beau filz, et le porta iusques à l’unziesme mois. Car autant, voire d’adventage, peuvent les femmes ventre porter, mesmement quand c’est quelque chef d’œuvre, & personnage qui doive en son temps faires grandes prouesses. Comme dict Homere que l’enfant (du quel Neptune engroissa la nymphe) nasquit l’an après revolu : ce fut le douziesme mois. Car (comme dict A. Gelle lib. 3.) ce long temps convenoit à la maiesté de Neptune, affin qu’en icelluy l’enfant feust formé à perfection. À pareille raison Iupiter feist durer xlvii heures la nuyct qu’il coucha avecques Alcmene. Car en moins de temps n’eust il peu forger Hercules : qui nettoia le monde de monstres & tirans. Messieurs les anciens Pantagruelistes ont conformé ce que ie dis, & ont declairé non seulement possible, mais aussi legitime l’enfant né de femme l’unziesme moys après la mort de son mary. Hyppocrates lib. de alimento. Pline li. 7 cap. 5. Plaute in Cistellaria. Marcus Varro en la satyre inscripte, Le Testament, allegant l’autorité d’Aristoteles à ce propous.
Page:Rabelais - Gargantua, Juste, Lyon, 1535.djvu/15
Cette page a été validée par deux contributeurs.
