en sa gessine, sa mere luy rapporta que une nuict bien tart. elle devallant par les degres dune chambre qui est au dessus de leur estaige et ainsy quelle ouvroit la porte elle cuyst que la Françoise Chandelliere estant la aupres en une chambre de leur maison detenue parlant toute seulle, daultant quil ny avoit personne avecq elle, quelle disoit telles parolles : « Je suis bien trompee ! » et ou bien : « Tu mas bien trompee ! » lesquelles parolles lad. sa mere luy dit mesmes encores sabmedy au soir quelle avoit ouy dire a lad. Françoise. Et aultre na dit.
… Jehan Paris mary de lad. Françoise (sic pour Pernette) … a dit quil y a environ 4 ou 5 ans que le bruict estoit a Gentoz que lad. Françoise et Thivent du Bochet son mary avoient derobé certaines iebves estantz encores au fourretz au bourre au village de Mallavrand quilz avoient portees en leur vigne, (f. 21R) Mesmes par pl sieurs fois avant jour et nuict rancontra icelle du Bouchet allant et venant, et ce temps que luy inquis estoit garde des vignes, et aussy despuys. Et aultre na dit.
Noble Guilliaume Chevallier maistre juré… a dit quil y a environ 10 ans quil a cogneu lad. Françoise et Thivent au Bochet son mary, laquelle Françoise il a ouy soupsonner destre herese, mesmes a ouy dire que lon la creignoxit a lhospital de Geneve destre telle, et quil y a quelque temps, alors que la Claudeta estoit detenue a Geneve pour sorciere, que sa femme luy rapporta que lad. Françoise Chevallier sestoit adressee a elle et luy avoit demandé si elle savoit poinct quon accusat par malveulliance et que si ainsy estoit quicelle Claudeta laccuseroit, daultant quelle luy vouloit grand mal. Et quant aud. Thivent du Bochet, dit quil la aussy ouy soupsonner destre sorcier, mesmement la femme de luy inquis ayant une petite fillie eagee de 2 ans et 5 mois quelle avoit heue de son premier mary, led. Thivent Bochet entra en la maison de luy inquis ou il trouva lad. petite fillie avecq la chambriere toutes seullettes, daultant que luy inquis et sad. femme estoient au presche, lequel du Bouchet print lad. fillie en ses bras et lemporta en sa maison ou il luy donna a manger une crote de pain et puys la ra porta a lad. chambriere, et quant lad. fillie heust mangé led. pain, elle ne voulut quasi despuys rien manger, mais mourut de environ 8 jours apres, et avant que mourir ce qui luy sortoit par la bouche estoit aussy noir que resinee. Et aultre na dit.
