Alexandre subject à boire et courageux aussy.
De l’enfance d’Alexandre et de ses inclinations.Au demourant, dès qu’il estoit encores enfant, on cogneut esvidemment qu’il seroit continent quant aux femmes : car estant impetueux et vehement en toutes austres choses ; il estoit difficile à esmouvoir aux plaisirs du corps, et en prenoit fort sobrement : mais au contraire sa convoitise d’honneur estoit accompaignée d’une fermeté de courage et magnanimité plus constante que son age ne portoit : car il n’appetoit pas toute sorte de gloire, ny procedante de toutes choses indifferemment, comme faisoit son pere : lequel aimoit à monstrer son eloquence, comme eust faict un rhetoricien, et engravoit en ses monnoyes, les victoires qu’il avoit guaignées es courses de chevaulx et chariots aux jeux Olympicques : ains comme quelques-uns luy demandassent un jour s’il se vouldroit point presenter à la feste des jeux Olympicques, pour essayer d’y guaigner le prix de la course, pource qu’il estoit fort dispos, et leger du pied à merveille : ouy bien, respondict-il, 'si cestoyent roys quiy courussent' : combien qu’à parler universellement il haist toute sorte de ces combattants-là en jeux de prix : car ayant par plusieurs fois faict des festes, où il proposoit des prix aux joüeurs de tragedies et comoedies, aux chantres, et musiciens, joüeurs de fleustes et de cythres, et jusques aux poëtes, et où semblablement il faisoit faire des chasses diverses de tout genre de bestes, et des combats à coups de
