Pour ceste besoingne eut ledit bastart parolles, présent le duc de Bethefort, régent, et luy vouloit ledit duc faire despendre par ung de ses gens, pour ce que on luy avoit donné à entendre que yceulx la portoient pour vouloir combatre tous Englès qui la voudroient despendre, sans autre querelle ; mais quant le duc de Bethefort, régent, fut adverti de la querelle pour quoy ilz la portoient, il s’en souffry atant.
Quant le duc de Bethefort, régent, et la ducesse sa femme eurent séjourné cinq ou six jours à Hedin, et que le duc Phelipe leur eut fait grant chière, comme dit est devant, lors il s’en alla à Paris, où il séjourna long-temps : et depuis fut tant traitié par le moyen du dit duc de Bethefort, régent, que la journée qui estoit entre le duc de Clocestre et le duc Phelipe de Bourgoingne fut mise du tout au néant. Maiz nonobstant quelque traitié qui fust entre eulx, si n’aymoient-ilz mie l’un l’autre.
