Le texte de cette page a été corrigé et est conforme au fac-similé.
168
la comédie
STROPHE
Chœur
Deçà les Conseillers sont
Qui dessus leurs mules vont
Et traisnent une grand’suicte
D’hommes qui les solicite ;
Ilz se voyent respectez
Et requis et honnetez
Des plus grandz qui les supplient
Et qui leurs faveurs mendient.
Icy dedans le parquet
L’advocat hautement tonne
Et de son brave caquet
Tous les assistans estonne ;
Au pezant de l’or il vend
Sa mere-nourrice langue,
Et souvent en sa harangue
Il ne dict rien que du vent,
Et ses discours vraysemblables
Ne sont gueres veritables,
Imitant par ce moyen
Ulisse Dulichien,
Duquel Homère nous chante
Que de sa bouche eloquente
Mille beaux propos sortoient
SYSTEME ENTRECOUPÉ
Mercure
Divins Cocus dont la vertu feconde
Renaist et prend sa vigueur par le monde,
