Le Roy tout seul ne commandoit aussi,
Car il n’eust peu souffrir tant de soucy,
Tant de travail, tant de fatigue en somme.
Mais les Cocus que Cocuans on nomme,
Qui ont l’esprit gaillard, gentil et vif,
Et le courage encore plus actif,
Dont le beau poil et le visage insigne
De commander à noz Cocus est digne,
Estoient commis pour les maçons guider
Et à chacun sa tâche commander.
C’estoit bien faict, il n’eu falloit point d’autres
Plus suffisans commettre entre les nostres,
Comme Platon philosophe ancien,
Dessouz le nom de Socrate dict bien :
« Que tout le corps d’un peuple qui s’assemble
« Dans une ville en union ensemble,
« Contient en soy trois sortes de bourgeois :
« Les uns sont d’or qui regnent comme roys,
« Nobles de cœur, de vertus et de race,
« Et comme l’or tous les metaux surpasse
« En prix, en lustre et en riche splendeur,
« Passent ainsi en royale grandeur
« Leurs citoyens, qui prisans leur puissance,
« Leur vont portant une humble obeyssance,
« Et les secondz sont de l’argent formez,
« Moindre que l’or, moins que l’or estimez,
« Et toutesfois non pas moins necessaires
« Pour ordonner les publiques affaires,
« Riches de biens, d’honneur, d’authoritez,
« De hautz estaz et grandes dignitez,
« Nez au commun et respirant la vie
« Tant seullement pour servir leur patrie,
