Et me guidant selon l’authorité
De tous ceux-là qui l’ont interpreté,
J’ay maintenant l’intelligence claire
Des fonctions que peut nature faire ;
Je sçay comment imiter il la faut
En ce qu’elle a de plus brave et plus haut,
Et suis venu aux bons Cocus que j’ayme
Pour leur monstrer ma science supreme.
Mais tu pensois tantost nous sermonner
Que tu ne doibz ton sçavoir profaner
Et que pour nous c’est une lettre close ;
Quel changement, quelle metarmophose
T’a faict depuis ton vouloir esgarer,
Que tu nous veux à present le monstrer ?
Je dis encor et asseure immuable
Que mon sçavoir secret et profitable
Ne doibt point estre à tous abandonné,
De peur qu’enfin il ne soit profané :
Ainçois il faut ses principes utiles
Voiler de motz obscurs et difficiles,
Que l’on ne puisse aizement expliquer
Si son travail on n’y veult appliquer.
Jadis Tiphys dans sa nef Argienne,
Alla guidant la troupe Mynienne,
Jusqu’en Colchos pour avoir la toison
Jà destinée aux labeurs de Jason.
Cette toison fut une peau blanchie
Où les secretz de la sainte Alchemie
Estoient escritz tant seulement pour ceux
Qui en vertu se monstroient genereux,
Comme Jason et toute la noblesse
Qui florissoit alors dedans la Grèce,
