Page:Pierre Belon - L'histoire de la nature des oyseaux.djvu/318

froidures ou aspreté des rochers, comme des plaines habitees, tant en la jurisdiction des Roys, & Empereurs Chrestiens, que de Turcquie. Ce n’est donc merveille si tels oyseaux s’en vont paistre en ces lieux lá durant l’esté. Ceste espece de Corneille vit de mesmes viandes, que fait la noire, & est d’aussi grande corpulence, & hante semblablement le rivage : qui est cause d’avoir meu quelques uns de dire que les anciens avoyent entendu qu’elle avoit nom Cornix, ne sçachants qu’il y en eust une autre. Elle ha la teste, toutes les aelles, & la queuë fort noires, & un plastron devant l’estomach de mesme couleur, qui est bordé par le dessus comme de coches, faictes des plumes sur les cendrees, les noires encrans sur les autres : Car tout le dos, le dessus du col, les costez par dessous les aelles, les cuïsses, & le dessous du ventre sont de couleur cendree. C’est de lá qu’elle ha gaigné son appellation Françoyse : car il semble qu’elle est emmantelee de couleur cendree dessus le noir. Ceux qui la nomment Cornix marina, nous semblent n’avoir authorité, ou occasion de ce faire : car on la trouve aussi bien viander par les lieux mediterranees, comme on fait à la marine : joint que Arrian, qui ha parlé du Coroni Thalassios, entendoit d’une espece de Plongeon, ressemblant au Cormarant, qu’il avoit veuë en sa navigation sur le pont Euxin.