Il est fait mention qu’il fut apporté une espece de Perdris à Cesar, plus grosse qu’un Vautour : de laquelle avons parlé au chapitre du Faisan.
De la Perdris blanche.
CHAP. XVII.
OUT ainsi que le Francolin, & Coc de bois, qui ont à hanter les froides montagnes, ont leurs jambes & pieds couvertes de plumes, tout aussi ceste Perdris blanche, qui hante semblables contrees, ayant les jambes & pieds couverts de plumes fut nommee en Latin Lagopus. Car qui voiroit une de ses jambes, diroit proprement que c’est le pied d’un Lievre. Possible qu’Aristote ne l’ha cogneuë nomplus que l’Ofre, entendu qu’il cognoist le Lievre seul qui à poil desous les pieds : mais l’Ofre en ha aussi, de laquelle baillerons le portrait au livre des bestes prises à la chasse de Medan, & Villaine, en faveur de M. Jan Brinon, conseiller du Roy. C’est à bon droit que les Savoysiens, & autres habitans des montagnes ont nommé ceste Perdris blanche : car elle ensuit la Perdris tant en meurs, en voix, comme aussi en la similitude & en saveur, sinon qu’elle est de moindre corpulence. On la voit si frequente en païs de montagnes, qu’on ne mange gibbier plus commun par les villages & villes situëes entre les hautes montagnes de Savoye. Aussi estoit anciennement venduë à Romme : car Pline au quarente-huittiesme chapitre, du dixiesme livre de son histoire, dit : Praecipuo sapore Lagopus est, pedes
