Page:Pierre Belon - L'histoire de la nature des oyseaux.djvu/194

le bec devant le jargueul jusques à moictié du col, & au dessous des yeux la couleur en est blanche, se rapportant à l’habit des Nonnains qui ont leurs couvrechefs noirs doublez de blanc. Sa queuë est courte & noire : ses aelles, & sur le dos sont de couleur plombee, ayant ainsi les madrures aux deux costez des cuisses, comme l’Oye & la Cane de mer. Estant donc de la forme d’une Oye, & le col long, & la corpulence plus petite, semble estre haut enjambee. Ses pieds sont plats & larges & fort noirs, comme aussi est sa jambe, & son bec & ses yeux : mais le bec est rond & plus court que celuy de l’Oye, & avec sa rondeur est mousse par le bout. Sa maniëre de cheminer, de se nourrir, crier, & faire voix est comme d’une Oye. Et nous cherchants quel nom pouvoit obtenir ceste Oye des anciens, & nayants trouvé aucun autre oyseau qui pust raisonnablement avoir le nom de Vulpanser, avons facilement accordé, qu’elle doit estre nommee Vulpanser, & en Grec Chinalopix. Les anciens le nommerent ainsi, pource que lors qu’elle nourrit ses petits, elle use de finesse de regnard en les faisant eschaper. Chenalopex est diction Greque signifiant Oye regnard. Car quand quelqu’un ha trouvé ses petits, elle vient au secours faisant semblant de se vouloir laisser prendre : l’une fois monstre avoir l’aelle rompuë, l’autre fois la cuisse. Ce pendant ses petits eschappent : alors elle prend son vol & se salve. On la nourrit es cours des grands seigneurs seulement : parquoy n’est encor guere commune par les villes, & villages de France.