Du Hibou sans cornes, ou Chahuant.
CHAP. XXXII.
ES-JA ha esté dit que les oyseaux de nuict, qui nous sont les plus communs, sont Ducs, grands, moyens, & petits, Cheveches, Hulotes, & Hibous : mais le Hibou est encor le mieux cogneu, entant qu’il est plus commun. Il est plus grand que la Cheveche & la Hulote, mais est plus petit que les deux Ducs. Tous ces oyseaux ont cela de particuliër, qu’ils ciglent des yeux amenants la paupiëre de dessus à celle d’embas, comme aussi font touts oyseaux de rapine. Le Hibou, & Cheveche n’ont point de cornes ou aureilles, comme le grand Duc, & le petit, & la Hulote : mais ont comme une coronne de plumes, qui leur entourne le devant de la teste, sçavoir est dessus les yeux, comme si c’estoyent sourcils eslevez hault, & leur prennent par les costez de la teste, & par dessous la gorge, comme si c’estoit un collier. Le Hibou ha les yeux enfoncez leans moult profonds, gros, & noirs. Tout le devant, & le dessous du ventre est blanc merqué
