Page:Pierre Belon - L'histoire de la nature des oyseaux.djvu/121

touts deux sont larges. Les Vautours pour estre de corpulence grosse, lourde, & pesante, ne peuvent voler de terre, qu’ils n’ayent premierement prins advantage en courant, ou bien qu’ils se partent de dessus une grosse bute. Nous sommes esmerveillez d’avoir veu tant de Vautours en troupe par les campagnes es deserts entre le Caire & la mer rouge. Mais cela advient pource que communement ce chemin lá est si frequenté des chameaux d’Egypte, dont plusieurs y meurent, qu’on peut dire que c’est leur vray cemetiere, & les Vautours qui vivent de charongne, y ont tousjours pasture. Les anciens ont escrit que les Vautours sont duits à suyvre les exercites, c’est à dire les camps : mais il fault l’entendre du païs de levant : car on les voit rarement par les plaines d’Italie, Almaigne, & France, sinon en hyver, qu’on les voit voler en touts lieux : car ils laissent les summitez des haultes montaignes, evitants la grande froidure, & passent oultre la mer es regions chauldes : comme aussi nous, estants lors de la famille de M. Guillaume du Prat, evesque de Clairmont, en ayons veu l’esté sur le mont d’or en Auvergne. Encores dient que les Vautours prevoyent deux jours avant, ou les camps doyvent arriver : mais l’occasion en est l’esperance de se saouler des tripailles, charongnes, & vuïdange des bestes. Les Vautours ne font communement que deux ou trois petits, mais il y ha mout grande difficulté à les denicher : car le plus souvent ils font leur nid au costé de quelque falaise en lieux precipiteux, & de difficile accez.