Page:Pierre Belon - L'histoire de la nature des oyseaux.djvu/112

à ceste occasion s’est trouvé plusieurs Faulconniers qui se sont employez, & ont mis livres en lumiere, contenants plusieurs remedes à propos ausquels renvoyons pour le present, ne voulants consumer temps à transcrire ce qu’ils ont escrit. Les oyseaux peuvent estre disposez bien ou mal, maigres ou gras, si les partiës interieures sont deuëment ou mal temperees : Car aussi bien leur peuvent advenir douleurs comme aux animaux terrestres, & mourir pour estre trop extenuëz, ou avoir trop grande abondance de graisse, avoir mal à la teste, endurer le flux de ventre, au contraire l’avoir trop estraint, avoir catarres, le chancre au bec, avoir mal aux yeux, surdité aux ouïes, estre puants des narines, avoir l’esquinantie en la gorge, porter la pepie sur la langue, avoir le siflet empesché, & estre enrouëz, avoir les poulmons deseichez, ou trop humectez, & faulte d’haleine, & defaillance de cœur, tomber du haut mal, endurer vomissements, defaillance d’appetit, ou bien l’avoir trop grand, le foye eschauffé, estre malades de la jaulnisse, avoir la galle, & estre mangez des pouls, avoir des verms au ventre, & endurer les trenchees, estre tormentez de la podagre, & avoir les nerfs retirez : comme aussi telle fois leurs ongles tombent par maladies, & meurent pour avoir le bec mal ordonné. Mais nature estant benigne ha voulu leur apprendre infinis remedes pour se medeciner eux mesmes. Et qui plus est, aucuns d’iceux ont esté nos docteurs à nous enseigner plusieurs secrets en medecine. Lon tient que sans les Cigognes l’usage des chysteres ne nous seroit frequent. Le Pelican, qui fait son nid contre terre, trouvant ses petits blessez du Serpent, leur tire de son sang pour les guerir. Les Cailles se purgent de la semence d’hellebore, & les Estourneaux de Cicuë. L’herbe de Chelidoine ha prins son nom de ce que l’Irondelle medecine ses petits avec son just. La Cigogne se medecine avec de l’Origan. Les Ramiers, Corbeaux, Merles, Jays, & Perdris se purgent de Laurier. Les Turtrelles, les Pigeons, & Cocs se purgent avec de la Campanette. Les Canes, & Oyës avec de l’herbe d’orvalle. Les Gruës, & Herons avec du Jonc palustre, les Grives, Merles, Litornes, & Ramiers s’engressent l’hyver des semences de Lierre, qui seroit viande mauvaise à l’homme. Les republiques bien constituees, veulent que la police ait esgard sur les oyseleurs de leurs contrees, laquelle ne sera hors de nostre observation, d’estre escrite avant finir ce premier livre. C’est que les chefs qui ont soing sur le trafic des oyseleurs, veulent que comme il n’y ha petit estat & mestier, qui ne soit mis en valeur de maistrise, aussi ceux qui se meslent de porter vendre les oysillons vivants en cage, ayent certain lieu deputé es villes, pour se trouver es jours de feste, les matins seulement. Les autres qui apportent les oyseaux morts pour manger, ont autre place. Ces oyseleurs peuvent vendre toutes manieres d’oyseaux en toutes saisons, hors mis au prin-temps, lesquels encor qu’ils ayent lors congé de vendre les petits, toutesfois il leur est defendu en ce temps lá, de prendre les peres, sçachants qu’ils sont empeschez à couver & eslever leurs petits. Ceux qui font trafic d’oyseaux à Paris, doivent donner liberté à plusieurs petits oysillons sur le pont au Change, quand le Roy y passe, le jour de son entree.