56 [1596] ŒCONOMIES ROYALES,
se remettre en bonne intelligence avec vous, qu’en effet elle avoit affectionné de longue-main, et commença d’en donner quelques indices par le moyen de madame vostre femme, laquelle vous aviez laissée en couche à Moret.
Car, comme estant allée au presche à Fontainebleau, un jour que Madame gardoit le liet, elle s’en voulut retourner sans la voir, madame de Pangeas luy fit grande instance de vouloir disner avec les dames, ou à tout le moins ne partir point sans voir Madame, et qu’elle se fut excusée de l’un et de l’autre, disant n’y avoir point d’apparence qu’elle pust estre bien venuë en la maison d’une princesse qui vouloit tant de mal à son mary, que de luy en avoir deffendu l’entrée, et ainsi s’en retournast disner à Moret. Cela ayant esté rapporté à Madame, la seconde fois que madame vostre femme vint au presche, elle luy envoya dire qu’elle ne fist plus de difficulté de la venir voir, et qu’elle seroit la très-bien venuë. Ce qu’ayant fait, elle luy dit qu’elle n’estoit pas si mauvaise ny si vindicative qu’elle l’avoit estimée, et que ces courroux ne passoient pas outre la personne qui l’avoit offencée, pour l’estendre sur tous ceux qui luy appartenoient, et qui ne pouvoient mais de ses malices ; qu’elle la tenoit pour bonne femme, et partant ne laisseroit pas de l’aymer, quelque mal que vous luy eussiez fait, sans vous en avoir donné sujet, qu’elle eust plutost attendu de tout autre que de vous, veu le long-temps qu’il y avoit que vous-vous cognoissiez, ayans esté comme nourris ensemble dés l’enfance, avec des témoignages réciproques, vous de luy estre affectionné serviteur, et elle de vos
