tout le conseil qui estoit auprès d’eux, si préparez à ce que je leur proposay de la part du mareschal, qu’ils me dirent estre entierement de son opinion, mais qu’il sembloit que ce ne fust celle du duc de Guise, lequel se vouloit attacher à Orléans de sa seule volonté.
Gonnor, frere dudit mareschal de Brissac, qui avoit la super-intendance generale des finances, pressoit fort de conseil et de raisons semblables à celles de son frere, que le duc de Guise s’acheminast incontinent en Normandie. De sorte qu’à mesme heure je fus depesché du Roy et de la Reyne sa mère, par l’advis de tout le conseil qui estoit auprès d’eux, pour aller trouver le duc de Guise qui faisoit ses approches à Orléans. Et comme il n’y a que quatre postes j’y arrivay devant son disner ; et incontinent après il s’en alla voir son infanterie, qui estoit à deux cents pas du faux-bourg du Portereau, sur les deux costez du droit chemin, qui l’attendoit sans faire aucun bruit, suivant le commandement qu’elle en avoit reçu.
Là je proposai au duc de Guise, le plus briefvement qu’il me fut possible, la commission que j’avois. Mais il ne me respondit autre chose, sinon que j’estois le fort bien venu, et que nous aurions du temps à parler et resoudre sur une affaire de telle importance ; puis me fit bailler un bon cheval de son escurie, et me commanda de le suivre et de bien considérer les gens de pied qui estoient en cette armée, les meilleurs, disoit-il, qu’il eust jamais veu, et d’aussi bons maistres de camp et capitaines qu’il y en eust en France, et entr’autres Martigues, leur colonel, qui estoit plein de valeur et de courage. Au mesme temps il met pied à terre au milieu de ses troupes, parle à quelques capitaines
