advisa de retirer le mareschal de Vieilleville, et y envoya le mareschal de Brissac, pour estre lieutenant-general en toute la Normandie, et luy commit la puissance et authorité generale de reprendre les villes du Havre et Dieppe, et faire une armée pour empescher les desseins de l’Admiral en ladite province.
Et alors le Roy, pour diminuer et rompre les forces des huguenots, fut conseillé de faire publier un pardon generai à tous ceux qui se retireroient d’avec l’Admiral pour aller vivre paisiblement dans leurs maisons. Outre cela, Sa Majesté fit faire une déclaration particulière adressante aux princes d’Allemagne, pour leur faire entendre qu’elle estoit en pleine liberté, la Reyne sa mère, et messeigneurs ses frères ; et en envoya la copie au mareschal de Hesse et à ses reitremaistres, pour les inciter à se retirer hors du royaume de France, ou bien de se mettre à son service, et de laisser le parti de ses ennemis, mauvais sujets et perturbateurs du repos public qui les avoient déceus.
Cette déclaration estant venue à la cognoissance du mareschal de Hesse et de ses reistres, aussi-tost l’Admiral leur fit entendre qu’elle estoit contrainte et forcée ; que le Roy estoit mineur, comme aucuns des autres princes de son sang qui l’avoient signée par son commandement, et les autres intimidez, et la Reyne sa mère, par ceux qui les tenoient en subjection. Il escrivit le mesme à l’empereur Ferdinand et aux princes d’Allemagne pour les advertir de croire tout le contraire de ce que l’on leur avoit mandé, en les priant plustost de leur aider et envoyer le secours qui leur avoit esté promis, que de l’empescher et garder que les catholiques ne fissent des levées en Allemagne. La
