Cy sont les Chevaliers qui devront aller avec le roy saint Loys outre-mer, et les convenances qui furent entre eux et le Roy.
Monsieur de Valery y doit aller luy trentiéme de chevaliers, et luy doit ly Rois donner huit mille livres de tur, et doit avoir restor de chevaux du Roy à la coustume le Roy, et le passage : mais ils n’auront pas bouche à court, et demeuront un an, il et sa gent ; lequel an commencera si-tost comme ils seront arrivez à terre saiche de la mer. Et se advenoit que par accord ou par tourment de mer il convenist que l’en ivernast en isle, où ly Rois et l’ost ivernassent, parquoy il y demourast mer derriere eux, l’année commenceroit quand ils seroient arrivez pour iverner. Et si est assavoir que de ce que il donne à ses chevaliers, il leur doit payer la moitié de leurs dons, là où l’année commence ; et l’autre moitié quand la premiere moitié du demy an sera passée. Et si est assavoir que il doit passer à chacun banneret deux chevaux, et à chacun qui n’est pas banneret un cheval ; et ly chevaux emporte le garçon qui le garde. Et doit passer le banneret luy sixiéme de personne, et le pouvre homme soy tiers.
Ly connestable ira entresi lui quinziéme de chevaliers, és mêmes conditions que messire de Valery ira. Mès il n’aura du Roy que quatre mille livres tournois.
Monsieur Florent de Varennes ly admiraulx ira entresi en ses mêmes conditions luy douzeiesme de chevaliers, et aura du Roy trois mille deux cens cinquante-cinq livres tournois.
Monsieur Raoul d’Estrées ly mareschau ira entresi en ces mêmes conditions ly sixiesme de chevaliers, et aura seize cens livres tournois.
