Le texte de cette page a été corrigé et est conforme au fac-similé.
MÉMOIRES
DE
JACQUES DU CLERCQ.
LIVRE PREMIER.
CHAPITRE PREMIER.
Comment les Anglois prindrent Fougieres en Bretagne ; et des seigneuries que les Anglois possessoient en France.
En l’an 1448, durant les tresves entre Charles, roy de France septieme de ce nom, et Henry, roy d’Angleterre, fils du roy Henry et de Catherine de France, sœur du roy Charles dessusdit, prindrent par emblées les Anglois les ville et chastel de Fougieres, scituées en la duché de Bretaigne à l’entrée de Normandie : laquelle duché de Normandie, de Guienne, et d’autres moult grandes seigneuries au royaulme de France, icelui roy d’Angleterre possédoit. Ce Roy avoit environ vingt-huit ans ; et en son aige de huit à dix ans, par les guerres et divisions qui avoient été au royaulme de France, avoit esté couronné roy de
