II.
Marques de la veritable Religion.
a vraye Religion doit avoir pour marque d’obliger à aymer Dieu. Cela eſt bien juſte. Et cependant aucune autre que la noſtre ne l’a ordonné. Elle doit encore avoir connu la concupiſcence de l’homme, & l’impuiſſance où il eſt par luy meſme d’acquerir la vertu. Elle doit y avoir apporté les remedes dont la priere eſt le principal. Noſtre Religion a fait tout cela ; & nulle autre n’a jamais demandé à Dieu de l’aymer & de le ſuivre.
§ Il faut pour faire qu’une Religion ſoit vraye qu’elle ayt connu noſtre nature. Car la vraye nature de l’homme, ſon vray bien, la vraye vertue, & la vraye Religion ſont choſes dont la connoiſſance eſt inſeparable. Elle doit avoir connu la grandeur & la baſſeſſe de l’homme, & la raiſon de l’un & de l’autre. Quelle autre Re-