mens qui operent tout ſans nous. Ny l’un ny l’autre n’eſt la Religion Chreſtienne ny Juive.
§ Les vrais Juifs & les vrais Chreſtiens ont reconnu un Meſſie qui les feroit aymer Dieu, & par cet amour triompher de leurs ennemis.
§ Le voile qui eſt ſur les livres de l’Eſcriture pour les Juifs, y eſt auſſi pour les mauvais Chreſtiens, & pour tous ceux qui ne ſe haiſſent pas eux meſmes. Mais qu’on eſt bien diſposé à les entendre, & à connoiſtre Jesus-Christ quand on ſe hait veritablement ſoy meſme !
§ Les Juifs charnels tiennent le milieu entre les Chreſtiens & les Payens. Les Payens ne connoiſſent point Dieu, & n’aiment que la terre. Les Juifs connoiſſent le vray Dieu, et n’ayment que la terre. Les Chreſtiens connoiſſent le vray Dieu, & n’ayment point la terre. Les Juifs & les Payens ayment les meſmes biens. Les Juifs & les Chreſtiens connoiſſent le meſme Dieu.
§ C’eſt viſiblement un peuple fait
