temps du ſecond ne l’eſt point ; parce que le premier devoit eſtre caché ; au lieu que le ſecond doit eſtre éclattant, & tellement manifeſte que ſes ennemis meſmes le reconnoistront. Mais comme il ne devoit venir qu’obſcurément, & pour eſtre connu ſeulement de ceux qui ſonderoient les Eſcritures, Dieu avoit tellement diſpoſé les choſes que tout ſervoit à le faire reconnoiſtre. Les Juifs le prouvoient en le recevant ; car ils eſtoient les dépoſitaires des propheties : & ils le prouvoient auſſi en ne le recevant point ; parce qu’en cela ils accompliſſoient les propheties.
§ Les Juifs avoient des miracles, des propheties qu’ils voyoient accomplir, & la doctrine de leur loy eſtoit de n’adorer & de n’aymer qu’un Dieu ; elle eſtoit auſſi perpetuelle. Ainſi elle avoit toutes les marques de la vraye Religion ; auſſi l’eſtoit elle. Mais il faut diſtinguer la doctrine des Juifs, d’avec la doctrine de la loy des Juifs. Or la doctrine des Juifs n’eſtoit pas vraye, quoy
