voulu ſe rendre centre de luy meſme, & independant de mon ſecours. Il s’eſt ſouſtrait à ma domination : & s’égalant à moy par le deſir de trouver la felicité en luy meſme, je l’ay abandonné à luy ; & revoltant toutes les creatures qui luy eſtoient ſoumises je les luy ay rendu ennemies ; en ſorte qu’aujourd’huy l’homme eſt devenu ſemblable aux beſtes, & dans un tel éloignement de moy qu’à peine lut reſte-t’il quelque lumiere confuſe de ſon autheur, tant toutes ſes connoiſſances ont eſté éteintes ou troublées. Les ſens independans de la raiſon & souvent maiſtres de la raiſon l’ont emporté à la recherche des plaiſirs. Toutes les creatures ou l’affligent ou le tentent, & dominent sur luy ou en le ſoumettant par leur force, ou en le charmant par leurs douceurs, ce qui eſt encore une domination plus terrible & plus imperieuſe.
§ Voylà l’eſtat où les hommes ſont aujourd’huy. Il leur reſte quelque inſtinct impuiſſant du bonheur
