Il le peut en effet,
Et i’ayme mieux encor en garder le ſecret :
Mais crois, Endymion, que quoy qu’il m’en arriue,
Pour empécher ta mort…
Tu veux donc que ie viue,
Genereuſe beauté ?
I’y feray mon pouuoir,
Et i’oſe viure encor avec ce doux eſpoir :
Que ſi par mon moyen, & par ma diligence
Les Dieux changent ton ſort ; apres ta deliurance
Tu ſçauras le ſubiet qui me peut faire agir,
Que meſme en y penſant me fait encor rougir :
Mais adieu, ie m’en vay taſcher s’il eſt poſſible,
De trouver vn moyen fauorable ou nuiſible.
Va diuine beauté, ſi tous en ſont d’accord,
I’y veux bien conſentir :
I’y feray mon effort.
Scène SIXIE’ME.
Nfin cette beauté, malgré ſa retenuë,
M’a preſque ouuert ſon cœur, ſa flame m’eſt cõnuë,
Quoy qu’elle en veuille déguiſer,
Sa rougeur me la fait connoiſtre ;
Et ſa douleur la fait paroiſtre,
Puiſque rien ne peut l’appaiſer.
