uent venir en vne autre, aussi en aucuns climats les pierres ne sont point semblables à celles d’vn autre climat : comme aussi ne sont les terres argileuses.
Tu m’as baillé beaucoup de raisons des formes, couleurs, duretez et pesanteurs des pierres, lesquelles choses m’estoient aisées à entendre, lors que tu en faisois la montre, Mais s’il me falloit à présent instruire vn autre de ce que tu m’as monstré, ie serois fort empesché, n’ayant aucunes preuues, comme tu auois, lors que tu faisois les demonstrations : parquoy ie voudrois que tu m’eusses baillé en peu de paroles, quelque belle conclusion, comme tu as fait des metaux et de l’eau generatiue.
S’il te souuient des points que ie t’ay enseignez, tu te rememoreras que pour la derniere conclusion de l’effet des pierres, ie prouuois deuant mes auditeurs que la matiere principale de toutes pierres n’estoit autre que l’eau congelatiue, de laquelle le cristal et diamant et toutes pierres diafanes sont composées. Et s’il te souuient, ne te montrois-ie pas certaines pierres d’agate et autres, qui estoyent candides sur la partie superieure, et tenebreuses en la partie inferieure ? ne disois-ie pas, auec preuues, que toutes les pierres tenebreuses et coulourées de quelque couleur que ce soit ne sont tenebreuses, ny coulourées, sinon par accident ? qui est que les pierres desquelles sont les meules pour aiguiser les ferremens, sont rendues tenebreuses à cause d’vn sable qui est meslé parmy l’eau congelatiue. Autres pierres sont rendues tenebreuses à cause de la terre qui est entre meslee parmy ladite eau ; tu peux assez auoir entendu la cause de ce, quand i’ay parlé des couleurs des pierres : et pour te rememorer les preuues que i’ay alleguées en mes leçons, il te faut souuenir de ce que ie te dis lors. Considere le cristal qui est en la roche, et tu connoistras que durant sa congelation la matiere d’iceluy estoit dedans les eaux, comme i’ay dit plusieurs fois : et quand les eaux sont troublées à cause des terres, la terre cherche tousiours le bas comme la lie dans vn poinson de vin : et de là vient que l’eau pure et l’impure se congelent toutes deux : mais la partie superieure sera de cristal pur et net, et l’inferieure sera d’vn cristal trouble.
