V.
Croix, paix, soubs vn accomply diuin verbe,
L’Espaigne & Gaule seront vnis ensemble :
Grand clade proche, & combat tres accerbe,
Cœur si hardy ne sera qui ne tremble.
VI.
D’habits nouueaux apres faicte la treuue,
Malice tramme & machination :
Premier mourra qui en fera la preuue,
Couleur venise insidiation.
VII.
Le mineur fils du grand & hay Prince,
De lepre aura à vingt ans grande tache,
De dueil sa mere mourra bien triste & mince,
Et il mourra là où tombe cher lache[1].
VIII.
La grand cité d’assaut prompt & repentin,
Surprins de nuict, garaes interrompus :
Les excubies & veilles sainct Quintin,
Trucidez gardes & les portails rompus.
IX.
Le chef du camp au milieu de la presse :
D’vn coup de fleche sera blessé aux cuisses,
Lors que Geneue en larmes & detresse,
Sera trahie par Lauzan[2], & Souysses.
X.
Le ieune Prince accusé faussement,
Mettra en trouble le camp & en querelles[3] :
Meurtry le chef pour le soustenement,
Sceptre appaiser : puis guérir escroüelles.