XXXII.
Le grand Empire sera tost translaté
En lieu petit, qui bien tost viendra croistre,
Lieu bien infime d’exigue comté,
Où au milieu viendra poser son sceptre.
XXXIII.
Pres d’vn grand pont de plaine spatieuse,
Le grand Lyon par forces Cesarees,
Fera abbatre hors cité rigoureuse,
Par effroy portes luy seront reserrees.
XXXIV.
L’oyseau de proye volant à la senestre,
Auant conflict faict aux François pareure :
L’vn bon prendra, l’vn[1] ambique[2] sinistre,
La partie foible tiendra par son[3] augure.
XXXV.
Le lyon ieune le vieux surmontera,
En champ bellique par singulier duelle :
Dans cage d’or les yeux luy creuera,
Deux classes vne, puis mourir, mort cruelle.
XXXVI.
Tard le monarque se viendra repentir,
De n’auoir mis a mort son aduersaire :
Mais viendra bien à plus haut consentir,
Que tout son sang par mort fera deffaire.
XXXVII.
Vn peu deuant que le Soleil s’absconde,
Conflict donné, grand peuple dubiteux :
Profligez, port marin ne faict response,
Pont & sepulchre en deux estranges lieux
