XXVI.
Quatre ans le siege quelque peu bien tiendra,
Vn suruiendra libidineux de vie :
Rauenne & Pyse, Veronne soustiendront,
Pour esleuer la croix de Pape enuie.
XXVII.
Dedans les Isles de cinq fleuues à vn,
Par le croissant du grand Chyren Selin :
Par les bruynes de l’air fureur de l’vn,
Six eschapez cachez fardeaux de lyn.
XXVIII.
Le grand Celtique entrera dedans Rome,
Menant amas d’exilez & bannis :
Le grand Pasteur mettra à mort tout homme,
Qui pour le coq estoyent aux Alpes vnis.
XXIX.
La vefue saincte entendant les nouuelles,
De ses rameaux mis en perplex & trouble :
Qui[1] sera duict appaiser les querelles,
Par son pourchas de[2] razes fera comble.
XXX.
Par l’apparence de faincte saincteté,
Sera trahy aux ennemis le siege.
Nuict qu’on cuidoit dormir en seureté,
Pres de Brabant marcheront ceux du[3] Liege.
XXXI.
Roy trouuera ce qu’il desiroit tant,
Quand le Prelat sera reprins à tort :
Responce au Duc le rendra mal content,
Qui dans Milan mettra plusieurs à mort.