Page:Nostradamus - Les oracles -1867.djvu/127

X.

Vn peu de temps les temples des couleurs
De blanc & noir des deux entre meslee^[1] :
Rouges & iaunes leur embleront les leurs,
Sang, terre, peste, faim, feu d’eau affollee.

XI.

Des sept rameaux^[2] à trois seront reduicts,
Les plus aisnez seront surprins par mort,
Fratricider les deux seront seduicts,
Les coniurez en dormans seront morts.

XII.

Dresser copies pour monter à l’empire,
Du Vatican le sang Royal tiendra :
Flamans, Anglois, Espagne auec Aspire,
Contre l’Italie & France contiendra^[3].

XIII.

Vn dubieux ne viendra loing du regne,
La plus grand part le voudra soustenir.
Vn Capitole ne voudra point qu’il regne,
Sa grande charge ne pourra maintenir^[4].

XIV.

Loing de sa terre Roy perdra la bataille,
Prompt eschappé poursuiuy suiuant prins,
Ignare prins soubs la doree maille,
Soubs feinct habit, & l’ennemy surprins.

XV.

Dessoubs la tombe sera trouué le Prince,
Qu’aura le pris^[5] par dessus Nuremberg :
L’espaignol Roy en capricorne mince,
Feinct & trahy par le grand Vvitemberg^[6].

1. Blanc & noir entremêlés, c’est-à-dire : gris.
2. Lisez : qui à.
3. Variante : contendra.
4. Construisez : il ne pourra maintenir sa grande charge.
5. Lisez : qui aura le prix.
6. Wittemberg.